Kamishna wa Maadili awataka viongozi kutoa ushirikiano wakitakiwa kuwasilisha taarifa za kibenki.


Kamishna wa Maadili awataka viongozi kutoa ushirikiano wakitakiwa kuwasilisha taarifa za kibenki.
11
Jan
2018

Kamishna wa Maadili awataka viongozi kutoa ushirikiano wakitakiwa kuwasilisha taarifa za kibenki "benk statement."

Kamishna wa Maadili Jaji (Mst) Harold Nsekela amewataka viongozi wa umma kutoa ushirikiano kwa Sekretarieti ya Maadili ya Viongozi pindi watakapotakiwa kuwasilisha taarifa zao za benki pamoja na nyaraka nyingine kama sehemu ya tamko la rasilimali na madeni.

Akizungumza na waandishi wa habari leo (11/1/2018) ofisini kwake jijini Dar es Salaam, Kamishna Nsekela alisema Sheria ya Maadili ya Viongozi wa Umma Na 13 ya mwaka 1995 inampa mamlaka ya kumuagiza kiongozi kuwasilisha nyaraka za mali anazomiliki zikiwemo hati za mashamba, viwanja, kadi za magali na taarifa za fedha "bank statement" kama sehemu ya tamko la raslimali na madeni ya kiongozi.

“Nikiwaandikia barua viongozi kuwataka kuwasilisha "bank statement" na nyaraka nyingine za mali wanazomiliki watoe ushirikiano kwasababu ni matakwa ya kisheria,” amesema.

Kamishna Nsekela alieleza kuwa baada ya zoezi la kupokea tamko kukamilika tarehe 31 Desemba, 2017, zoezi linaloendelea kwa sasa ni kuchambua matamko hayo ili kuona ni viongozi gani wataanza kuhakikiwa mali zao.

“Tukifikia wakati wa kuhakiki mali za viongozi baada ya uchambuzi wa matamko yao, watatakiwa kutoa ushirikiano. Tutataka wathibitishe mali hizo walizipataje?,” amesema na kuongeza kuwa viongozi hawatakiwi kuwa na hofu pindi wanapotakiwa kuhakikiwa mali zao kwasababu sheria ya maadili haiwazuii kumiliki mali, isipokuwa wathibitishe walivyozipata.

Kwa mujibu wa Kamishna Nsekela, Sekretarieti ya Maadili haipokei tamko kuwatunzia viongozi bila kulifanyia kazi ndio maana, lazima zoezi la uhakiki lifanyike.

“Hatupokei matamko ya viongozi kuwatunzia, lazima tuthibitishe waliyoandika ndani vinginevyo hatuna sababu ya kuwepo,” alisema.

“Viongozi wa Umma lazima waelewe kuwa tukienda kuhakiki mali zao, lengo letu ni kutaka kuthibitisha mali walizonazo na ni jukumu letu kufanya hivyo kisheria kwa mujibu wa kifungu cha 18 (2) (d) cha sheria ya Maadili sio kwamba tunawatuhumu,” alisema.